mutus wah wah slam

mutus wah wah slam

l'istorgia d'ün nerd in puter

andreas meier


EUR 16,90
EUR 13,99

Format: 13,5 x 21,5 cm
Seitenanzahl: 94
ISBN: 978-3-99131-985-6
Erscheinungsdatum: 04.05.2023
mutus es hacker ed in prüma lingia ün crack pertuchant algoritmus da deep learning. el demascrescha la recetta dals luxemburgherlis dal chocolatier sprüngli a turich. cun sieu talent as metta el però in prievel, cur ch'el inscuntra ad attila da la ditta webscan …
dedicaziun

per sophia, rico e diego



1 0
0 1

«tü est ün hacker e nu dist niauncha pled?», am dumanda attila. attila, schef da software da webscan, üna firma chi furnescha analisas dal web a bancas grandas, sgüraunzas e chocolatiers.
«gimme a chance», scrivi sün mieu laptop. al tegn vi il visur per ch’el possa ler mieu text. «che sun tias specialiteds, mutus?» dumanda’l inavous ed eau respuond cun ün’ulteriura lingia da text: «deep learning e soft computing».
algoritmus am haun già adüna fascino. da quels chi’d extiran da las datas informaziuns interessantas. identificaziun da muosters per exaimpel. cun que scuvreschast chosas cha nu savaivast fin uossa. cun hard coding nu funcziuna quelo. eau sun da l’avis cha drouvast metodas chi nu distinguan be nair dad alv, dimpersè chi resguardan tuot ils tuns grischs e fassettas.
«descriva ün da tieus progets», – attila am fo turner illa realted. invezza d’üna resposta tippeda al muossi mia app findoutfriends, al tegn vi mieu laptop. el nun esitescha e scriva sieu nom aint illa funcziun da tschercher. «wow», managia’l, e dumanda inavaunt: «cu chattast oura scha tia app filtrescha tieus collegas e na mieus e muossa lur lös ed activiteds?»
già cha attila tegna mieu laptop nu possi tipper ünguotta. eau met mieu maun vi da mia serraglia, spet ün mumaint, fuorm cuort üna balla ed evr il maun scu ün’explosiun i’l ajer. mieus gests dessan musser cha las idejas am saglian our dal cho e cha stöglian be auncha gnir programmedas.
«eau guard aunch’üna vouta tia documainta. es quelo ok per te?» eau dun dal cho. attila am do inavous mieu laptop. nus ans dains il maun e giand oura clama’l: «aunch’ün’ultima dumanda, mutus: perche taschast?» eau am volv, prouv da surrir e met il daunt vi dals leivs. alura suni dadour porta.



0 1
1 0

mutus piglia la via lungia a chesa. el chamina a la riva dal lej in direcziun dal zürihorn. sieus impissamaints giran intuorn il discuors cun attila. clappa’l üna schanza u brich?
da retuorn a la predigergasse decida’l da cuntinuer da zambrager vi da sias poesias da maschina pers-chatscher il discuors da preschantaziun our da sieu cho. el as lascha gugent accumpagner dal «köln concert» da keith jarrett, üna platta granda ch’el ho survgnieu da sieu non. inclus amplifichadur e grammofon.
poesias da maschina vegnan generedas d’üna maschina. ad es be da specificher input ed output. tiers as definescha ils algoritmus adattos. scu input tscherna mutus ils duos pleds flipflop e hiphop.
flipflops nu sun üngünas sandalas, dimpersè colliamaints electronics. flipflops sun la basa da colliamaints sequenziels e cun que da la tecnica digitela. mutus so cha sieu amplifichadur funcziuna cun simils elemaints da colliamaint, adonta cha quel ho già passa tschinquaunt’ans.
djs haun lantscho il hiphop i’ls ans settaunta dal tschientiner passo. els haun piglio il beat da la musica da funk, soul u disco e l’haun repetieu sainza suner l’inter töch. s’inclegia cha’d haun lascho ir tiers ils beats eir chanzuns u fat ir inavous las plattas. u druvo duos grammofons al listess mumaint cun retardamaint dal tun sün ün. scratching d’eira quella vouta la fuorma d’art la pü cultiveda tal hiphop. cun scratching as ho creo escapadas da suns e tuns in crusch ed in traviers in muvand vi e no las plattas in differents ritems.
la maschina prodüa innumbrablas poesias. zieva lungias ponderaziuns as decida mutus per ün poem cun ündesch lingias:

flipflop
hiphop
fliphop
flophip
hopflip
flophop
hipflip
hopflop
flopflip
hophip
flipflop

mutus as dumanda, chi chi’d es l’autur da quista poesia da maschina: el u la maschina? mutus ho fixo input ed output e programmo ils algoritmus. la maschina ho genero innumbrablas poesias culs pleds indatos flipflop e hiphop. mutus tscherna la poesia cun ündesch lingias, definescha il layout e la stampa cul printer da laser.



0 1
1 0

daspö dis spetta mutus invaun sün ün telefon dad attila. darcho pera ün ingaschamaint fix dalöntsch davent. per furtüna cugnuoscha’l ün per hackers chi’l surdaun incumbenzas cha nu sun buns da fer – per motivs da temp u pütost d’incumpetenza. l’indemnisaziun per sia lavur da filtrer, cu ch’el la nomna, es megra. ma almain as po’l tgnair sur ova cun quella lavur. e sia cumpetenza cun algoritmus da deep learning crescha cun mincha incumbenza.
il success da mutus fo il gir. ün pêr hackers vulessan cumprer sieus algoritmus, ma el desista. intaunt ch’el survain las incumbenzas las pü cumplichedas illa scena da hackers pera sieu avegnir d’esser sgüro. impü vuless el impuonder sieu know-how per sias poesias da maschina e perfecziuner quellas.
ad es da spetter. spetter a godot. eau nu se scha mutus cugnuoscha il töch da teater da samuel beckett. el ho gieu premiera als 5 schner dal 1953 al théâtre de babylone a paris. ils duos vagabunds estragon e wladimir spettan invaun üna resposta da godot ch’els cugnuoschan melapaina. mutus spetta eir üna resposta dad attila ch’el cugnuoscha melapaina.
per eviter da penser, per s-chatscher ils motivs da la catastrofa, continuescha mutus cul gö. trer aint e trer our las s-charpas, exercizis corporels, tschercher noms, sbragir slams da nonsens.
mutus prouva da fer passer il spetter e la lungurella. el programmescha poesias da tun i’l stil da la poesia concreta. el scannescha poesias da suns dad eugen gomringer e’s lascha inspirer. gomringer il poet da suns cun avenidas / avenidas y flores / flores / flores y mujeres / avenidas / avenidas y mujeres / avenidas y flores y mujeres y / un admirador. ünguotta per mutus. mutus es ün nerd, ün freak da computers. sieu credo: sbagls i’l sistem.



1 0
0 1

hoz am spetta üna variaziun. d’he invido ad ün per cumpagns per gamer vers saira. cler ch’eau cuschin qualchosa, scu adüna. e biera in abundanza es missa a fras-ch.
eau cumpr cuas da giamber, sardellas, rischcotschnas, barba di frate, nuschinas da pinias, capras saledas, tschiguollas cotschnas ed agl. frischlas d’agl, tschiguollas ed öli d’oliva sun mias ingredienzas las pü importantas per cuschiner. agl es il pü important, causa ch’el güda cunter la perdita da chavels, malatias dal pulmun e disturbis da menstruaziun.
sül menü metti dimena cuas da giamber cun salata da rischcotschnas scu antipast e spaghetti con agretti scu plat principel. perque nu possi desister da paquetter aint eir auncha ün chianti aint in üna butiglia da bast. per furtüna se, inua cumprer quist model da butiglia antiquo cun cuntgnieu. giuseppe, il taliaun in vicinanza, am declera regulermaing la cumposiziun da sieu chianti: sangiovese 70%, canaiolo nero 20% e malvasia 10% – vitigni a bacca bianca!
mia abitaziunetta i’l niederdorf a turich es plaina cun butiglias da bast vödas. eau las drouv scu decoraziun. la magiurited da quellas sun cuviertas cun puolvra ed haun sü üna patina.
finelmaing a chesa. eau tagl giò las rischs dal la barba di frate e lev la roba verda. il rest po spetter.
uossa metti sü keith jarrett e cunag mia pitschna abitaziun. zieva am metti giò ün mumaint e sfuondr i’l nirvana.
la triada da la sclingia da mia abitaziun am sdasda. anas, tina e steve spettan davaunt porta. nus ans branclains, ans tschantains a la maisa arduonda, tuot ils laptops avierts. eau vegn per biera e snacks ed alura partinsa i’l cyberspace.
zieva quatter u tschinch uras ans cuins üna posa. eau vegn in chadafö e tina am dumanda sch’ella possa güder.
ella prepara la salata da rischcotschnas cun tschiguollas cotschnas, aschaid da vin alv, öli d’oliva e puorvs. eau brass las cuas da giamber e met tiers frischlas d’agl tagliedas, salvgia, paiver e töchs da limetta verda. quelo vain servieu cun ciabatta e biera fras-cha.
zieva ün’ulteriura runda da giuver vöglian mieus cumpagns guarder tiers cu ch’eau prepar ils spaghetti con agretti. simpel: schmagagner sardellas in öli d’oliva, metter tiers tschiguollas tagliedas fin, frischlas d’agl e capras saledas e stufer. brasser separo nuschinas da pinia in öli da sesam, metter tiers la sosa e cundir cun sel e paiver. tiers ün süerv vin alv.
couscher al dente ils spaghets. gratter parmesan suravi ils spaghets e la sosa, servir cun ciabatta e metter sün maisa vin ed ova da la spina. buon appetito.
al cumgio dumandan ils cumpagns la recetta dals spaghetti con agretti. els am cugnuoschan. mieus trats predilets documentschi da maniera dobla: sülla vart davaunt d’üna carta postela stampi üna poesia da maschina adatteda, davous tradeschi la recetta cun adattaziuns persunelas chi vain adüna predscheda dals giasts. «vulais tadler mia poesia da suns a set lingias cul titel ‘hetti’?» projecteschi süls laptops da mieus sochis. tuots daun dal cho ed eau beamesch la poesia sün mieu synthesizer da sound zambragio svess cun 300 beats la secunda:

spag hetti con agretti
spag hetti cen agrotti
spag hetti can ogretti
spag hetti con egratti
spag hetti can egrotti
spag hetti cen ogratti
spag hetti con agretti



1 0
0 1

steve am contactescha sün mieu chanel sgür. sgür voul dir per steve e per me, cha druvains ün algoritmus criptografic da quants. avaunt ans vaivi sviluppo ün framework per la sgürezza dal trafic da noviteds e vendieu pü tard per ün bel rap. las metodas tradiziunelas da la public key infrastructure cun clevs privatas e publicas am paraivan memma melsgüras. impü: quista versiun dal argoritmus criptografic chi’s basa sülla nanotecnologia e ch’eau part cun steve ed ün per pochs hackers, nu’s po decoder pel mumaint. il motiv: eau d’he sviluppo svess quist algoritmus.
steve vuless chatter our las recettas dals luxemburgherlis per ün cliaint chinais. quel pera d’esser rich: in sieu suler pendan purtrets originels da van gogh, picasso e miró. voul dir: «sprüngli is a swiss luxury confectionary manufacturer founded in 1836 and internationally known for its signature macarons called luxemburgerli.» avaunt settaunt’ans dess ün pastizier da luxemburg – quels cugnuoschan ils affers cun tschiculatta daspö ans ed annorums, eir sainza swiss milk – avair piglio cun se adascus a turich la recetta pels macaruns implieus delizchus. üngün nun es bun da resister.
eau preferesch ils luxemburgherlis classics da vaniglia da bourbon e tschiculatta. invezza spordscha sprüngli hozindi üna quantited d’aromas: mocca, champagne, ampa, pistache, citrun, nitschoula u caramella – you name it.
l’imcumbenza am tainta: cas da spiunascha cunter swissness. hackers demascreschan il chocolatier sprüngli. scholt il misteri da la delicatezza luxuriusa da sprüngli. luxemburgherlis made in china.
dessi fer part ad ün tel cas da spiunascha industriela? scrupels am turmaintan. ma steve managia cha füssans ouravaunt a la concurrenza, scha vessans success. ed auncha qualchosa: il renom da sprüngli patescha. ils impiegos lavuran ad ün lavurer. eivnas cun ses dis da lavur sun normelas, ün solit di da lavur ho ündesch uras.
eau scriv a steve e dumand scha las eivnas da lavur in china sajan eir gnidas prolungidas. scha’ls chinais resguardan uossa set dis e nots da lavur per la classa da lavuraints scu normel. ed il punct culminant: la nomenclatura baiva château mouton-rothschild 1er cru classé da la frauntscha per tschaina e zieva the macallan single highland malt scotch whisky da l’ingialterra, accumpagno da swiss luxemburgherlis da sprüngli international.
steve m’offra tschinquaunta milli francs. eau accept.



0 1
1 0

zieva ch’el ho spetto eivnas survain mutus ün invid da webscan. ad es da fer ün assessment.
mutus ho las süjuors sül frunt e nu so sch’el dess piglier part u brich. zieva retscherchas i’l web es que cler cha’l spettan intervistas, tests, gös da rolla e situaziuns da stress. ün pêr freaks da webscan al vulessan analiser suot squitsch da temp. scuvrir sieus trats da caracter e chatter our sch’el es adatto scu programmeder per lezchas cumplexas.
mutus as cugnuoscha bain avuonda: suot stress nun è’l bun da scriver niaunch’üna lingia da cumand sül fögl u meglder dit indater illa maschina. sia soluziun es la calma. la not, cur cha tuots dorman, fo’l ir sieu mac e cumainza. cumand segua a cumand per analiser il problem. tscherchas cumplexas per chatter il misteri. metodas da deep learning per dresser il computer per calculaziuns ed oter pü.
impü: ad es previs ün assessment in gruppa. que voul dir, ch’el stu schoglier problems insembel cun oters candidats. ils incumbenzos da webscan vulessan chatter our, cu ch’el contribuescha a la comunicaziun infra la gruppa, chi chi’d es bun da’s fer valair e chi chi’d es il schef.
ünguotta per mutus, perche cha l’assessment dess dürer duos fin trais dis. püra orrur. mutus sdisch giò.
webscan nu ceda. invida a mutus da fer ün’exercizi da chavagna da posta. cò dess gnir analiso cu cha mutus s’organisescha, cu ch’el agescha e tira decisiuns. impü es previs ün cas concret per schoglier ün problem. dimena vulessan ils respunsabels da webscan chatter our scha mutus es bun d’analiser e da penser. üngün problem, quelo so’l sü per la daunta.
mutus consultescha il web per ün per tips per sieu assessment: scanner l’intrapraisa webscan ed imprender a cugnuoscher prodots. river punctuelmaing. analiser la branscha, cugnuoscher il profil da la plazza e pruver da’s referir a quel. güzzer las uraglias e tadler ad oters. lavurer da maniera structureda (analiser, planiser, realiser e controller). rester autentic. reagir da maniera neutrela sün attachas e provocaziuns. exerciter gös da rolla a chesa. esser consciaint cha’s vegn observo tuotta pezza, eir scha’s fo üna posa u stu ir in tualetta. e last but not least: ir a durmir ad ura e durmir avuonda.
ils meglders sochis da mutus scussaglian. tuots haun già passanto da quels strapatschs. cha que’s tratta adüna da la dumanda, cu cha’s es bun da’s vender e na da las egnas capaciteds.
steve managia cha mutus nu saja adatto per assessments e ch’el dess dumander da pudair schoglier üna lezcha a distanza. anas disch: «forget it.» tina al cussaglia da desister da quista lavada dal tscharvè, per na cruder in üna depressiun.
tuottüna: zieva üna not sainza sön, do mutus l’okay per ün excercizi da chavagna da posta cun webscan.

Das könnte ihnen auch gefallen :

mutus wah wah slam

Klara Lauk

....forever young

Weitere Bücher von diesem Autor

mutus wah wah slam

andreas meier

mutus wah wah slam

Buchbewertung:
*Pflichtfelder